ललितपुर, बैशाख २ - चौथो नखिपोट राष्ट्रव्यापी खुला पुरुष भलिबल प्रतियोगिताको उपाधि नेपाली सेनाले जितेको छ । लनगनखेलस्थित सह–आयोजक नमुना मच्छिन्द्र उमाविको कोर्टमा शनिवार भएको उपाधि भिडन्तमा साविक विजेता सेनाले सशस्त्र प्रहरी बलको एपिएफ क्लबलाई २५–१९, १८–२५, २३–२५, २५–२१ र १५–५ ले हराउँदै उपाधि रक्षा गरेको हो ।
 

उपाधिसंगै सेनाले ६० हजार रुपैयाँ नगद पुरस्कार जित्यो । गत वर्षपनि उपविजेतामा सीमित एपिएफले ३० हजार रुपैयाँ पुरस्कारमा चित्त बुझायो ।
नखिपोट युथ क्लबद्वारा आयोजित प्रतियोगितामा जावलाखेल भलिबल प्रशिक्षण केन्द्रबाट वाक ओभर पाउदै तेश्रो भएको काभ्रे भलिबल क्लबले २० हजार रुपैयाँ पुरस्कार थाप्यो ।

एपिएफका मिलन मल्ल प्रतियोगिताकै उत्कृष्ट खेलाडी घोषित हुँदै ८ हजार नगद पुरस्कारबाट पुरस्कृत भए । सेनाका भोजबहादुर थापा उत्कृष्ट स्पाइकर, एपीएफका पुष्पराज मल्ल उत्कृष्ट डिफेन्डर तथा सेनाका राजु थापा उत्कृष्ट लिफ्टर चुनिए ।  गत चैत २५ गतेदेखि सुरु भएको प्रतियोगितामा ६ टिम सहभागी थिए । खेल राउन्ड रविन लिगका आधारमा भएको थियो ।