रोशन शिल्पकार, भक्तपुर, वैशाख १६- नगरकोट जाने बाटो भक्तपुर कमलविनायक-४ का बासिन्दाले अनिश्चितकालीन बन्द गरेका छन्। लामो समयदेखि सडक डिभिजन र भक्तपुर नगरपालिकाको विवादका कारण यसको निर्माण रोकिएको थियो। अहिले सडक डिभिजनले ढलसहितको बाटो निर्माण गर्न लाग्दा नगरपालिकाले रोकेपछि स्थानीय त्यसको विरोधमा उत्रेका हुन्।
पर्यटकीय क्षेत्र नगरकोट जाने बाटो विगत केही वर्षदेखि निर्माण हुन नसक्दा सो बाटो भएर आवतजावत् गर्न कठिनाई हुँदै आएको थियो। अहिले सो बाटो निर्माण हुन लाग्दा ढलको विवादले पुनः रोकिएपछि असन्तुष्टि बढेको हो।

ढल नहुँदा समस्यामा परेको भन्दै स्थानीयले बाटो ढलसहित निर्माण हुनुपर्ने माग राख्दै आएका थिए। सडक डिभिजनले ढलसहतिको बाटो बनाउन सबै मिलाइसकेको अवस्थामा भक्तपुर नगरपालिकाले पूर्वाग्रहीरुपले निर्माण रोकेको आरोप स्थानीयको छ। स्थानीय भाइराज थापाले बाटो निर्माणका लागि धेरै धाएपछि बल्ल बन्न लागेको थियो भन्दै थपे- नगरपालिकाले बनाउन स्वीकृति नदिएसम्म बाटो बन्द गरिनेछ।

उनले ७ वर्षअगाडि पनि ढल राख्‍नका लागि २० लाख रुपियाँ सङ्कलन गरी सम्पूर्ण सामग्री मिलाइसकेको तर नगरपालिकाका कारण ढल निर्माण हुन नस्कदा सामग्री टुटफुट तथा चोरी भएको बताए। अहिले पनि सोही अवस्था सिर्जना हुन लागेको भन्दै उनले सम्बन्धित निकायले जाँचबुझ गरी बाटो निर्माणका लागि स्वीकृति दिनुपर्ने बताए।

कमलविनायक-४ देखि नगरकोटको ४०० मिटर बाटो केही वर्षदेखि बिग्रेको छ। यही कारण धुलो उड्ने, पानी घरघरमा छिर्ने समस्या भोग्दै आएको स्थानीयको भनाई छ। यसैबीच जिल्ला प्रशासन कार्यालय भक्तपुरले आइतबार सम्बन्धितहरुबीच वार्ताका लागि आह्वान गरेको छ।