माधव दुलाल  - काठमाडौं, बैशाख २६ – काठमाडौंको सितापाइलामा चरेश कारखाना फेला परेको छ । लागु औषध कानुन कार्यान्वयन इकाई नयाँबानेश्वरबाट खटिएको प्रहरी टोलीले सितापाइलामा चरेश कारखाना फेला पारेको हो । कारखानाका संचालक बागलुङ घर बताउने देवेन्द्र विक्रम रोक्कालाई प्रहरीले पक्रेको छ ।
 

सिरक व्यापारको नाममा संचालित चरेश कारखानाबाट रोक्काका सहयोगी बाग्लुङका गोविन्द कुमार रोक्का छन्त्याल, रुकुम तकसेरा घर बताउने मनजित घर्तिमगर र बाग्लुङ बुर्तिबाङ घर बताउने नगेन्द्र थापालाई पनि प्रहरीले पक्रेर आज सार्वजनिक गरेको छ ।

‘पाँच रोपनी क्षेत्रफलमा फैलिएको २ तले घरमा चरेश कारखाना संचालन गरेको देखियो’, इकाईका प्रमूख एसएसपी नवराज सिलवालले भन्नुभयो, ‘श्रीमती र छोरालाई क्यानाडामा राखेर भारतको गोवा हुँदै चरेश क्यानाडा निर्यात गरिरहेको प्रारम्भिक अनुसन्धानमा खुलेको छ ।’ रोक्काले चरेश जापान र जर्मनीमा पनि निर्यात गर्ने गरेको सिलवालले बताउनु भयो ।

रोक्का २०२७ सालदेखि चरेशको कारोवारमा संलग्न रहेको प्रहरी बताएको छ । प्रहरीले बा २ च ६१७० नम्बरको गाडी, बैंक अफ काठमाण्डु लिमिटेड तथा एभरेष्ट बैंक लिमिटेड लगायत विभिन्न बैंकको ३५ थान चेक बुक, विभिन्न बैकहरुको एटिएम कार्ड १२ थान, मोबाईल ४ थान बरामद गरेको छ । यस्तै ४९ हजार नेपाली रुपैयाँ,  हजार भारतीय रुपैयाँ, अवैध लागू औषध चरेस सिरक भित्र लुकाई कागजको ठूलो काटुन बक्समा राखी लैजान लागेको अवस्थामा १ सय ५ किलोग्राम र देवेन्द्रको सितापाईला गाविस ५ मा रहेको घरबाट ३५ किलोग्राम चरेश बरामद गरिएको प्रहरीले जानकारी दिएको छ ।

यस्तै फलामको तौल मेशिन १ थान, अवैध चरेश तताई पाता बनाउनको लागि प्रयोग गरिने ईलक्ट्रोनिक मेशिन १ थान, प्लाष्टिक प्याक गर्न प्रयोग गरिने मिशिन ४ थान पनि बरामद गरेको जनाएको छ ।

प्रहरीको विज्ञप्ती
अवैध लागूऔषध चरेश तथा निर्माण उपकरण सहित पक्राऊ

१. मुख्य अभियुक्तको विवरणः–

    नामः– देवी भन्ने देवेन्द्र विक्रम रोक्का (छपाली)
    उमेरः– ५३ बर्ष
    शैक्षिक योग्यताः– एसएलसी पास
    स्थाई ठेगानाः– बाग्लुङ जिल्ला तमान गा.वि.स ६ घर बताउने
    अस्थाई ठेगानाः– काठमाण्डौ जिल्ला सितापाईला गा.वि.स वडा नं.५

२. पक्राऊ अन्य अभियुक्तहरुः–

— बाग्लुङ, तमान तर्फ घर बताउने बर्ष ४८, को गोविन्द कुमार रोक्का छन्त्याल
—    रुकुम तकसेरा गा.वि.स घर बताउने बर्ष ६० को मनजित घर्तिमगर
—    बाग्लुङ बुर्तिबाङतर्फ घर बताउने बर्ष ३० को नगेन्द्र थापा

३. घटना विवरणः–

मिति २०६९।०१।२४ गते सांझ१७ः०० बजेको समयमा विशेष सुराकीको आधारमा का.जि बांडभन्ज्याङ गा.वि.स वडा नं. ५ स्थित जेसिसे सामुदायिक वन नजिकै रहेको पृथ्वी राजमार्गबाट नागढुङ्गा तर्फ आउदा बाँया पर्ने सार्वजनिक सडक किनारामा बा २ च ६१७० नंं को टाटा मोवाईलको गाडी रोकिरहेको अवस्थामा चरेश सहित  मानिस पक्राउ गरिएको ।

४. बरामद गरिएको सर–सामानहरुः—

– बा२च ६१७० नं.को गाडी
– बैक अफ काठमाण्डौ लिमिटेड तथा एभरेष्ट बैंक लिमिटेड लगायत विभिन्न बैंकको ३५ थान चेक बुक, विभिन्न बैकहरुको ए.टि.एम कार्ड १२ थान, मोवाईल ४ थान, ने.रु. ४९०००।– भा.रु. ७०००।– अवैध ला.औ.चरेस सिरक भित्र लुकाई कागजको ठूलो काटुन वक्समा राखी लैजान लागेको अवस्थामा १०५     किलोग्राम र निज देवेन्द्रको का.जि सितापाईला गा.वि.स ५ स्थित घरबाट ३५ किलोग्राम चरेश बरामद गरिएको । (जम्मा १३६ किलोग्राम चरेश)
–    फलामको तौल मेशिन १ थान
–    अवैध चरेश तताई पाता बनाउनको लागि प्रयोग गरिने ईलक्ट्रोनिक मेशिन १ थान
–    प्लाष्टिक प्याक गर्न प्रयोग गरिने मिशिन ४ थान
–    –यापिङ्ग प्लाष्टिक रोलहरु    

५. अपराधिक पृष्ठभूमीः–

–    निज देवेन्द्र विक्रम रोक्का छपाली २०२७ साल देखि अवैध ला.औ.(चरेश) ओसार पसार तथा विक्री वितरणमा   निरन्तररुपमा संलग्न रहेको
–    मिति २०३६ असाढमा ला.औ.चरेश केशमा काठमाण्डौबाट पक्राउ भै १ महिना १५ दिन कारागार बसि धरौटीमा छुटेको ।
–    मिति २०४२ चैत्र ७ गते पक्राउ परी ४ वर्ष ६ महिना जेल भुक्तान गरेको  
–    निजले नेपालबाट लामो समय देखि अवैध ला.औ.चरेश भारतको गोवा हुँदै समुद्री मार्ग मार्फत क्यानडा र जर्मनीमा पठाउने गरेको ।
नोटः– निज देवेन्द्र विक्रम रोक्का छोपाली विगत लामो समय देखि अन्तराष्ट्रिय नेटवर्कमा संलग्न रही अवैध लागु औषध चरेशको कारोवार गर्ने गिरोहको एक मुख्य व्यक्ति भएको ।