काठमाडौ, जेष्ठ १३ - नेपाली पेस बलरद्वय अमृत भट्टराई र चन्द्र साउद श्री लंकन लिगमा खेल्ने भएका छन् । दुवै खेलाडीलाई नेपाली राष्ट्रिय क्रिकेट टिमका प्रशिक्षक पुबुदु दासानायकेले खेल्ने वातावरण मिलाइदिएका हुन् । दुवै खेलाडीको सम्झौता पक्का भइसकेको पुबुदुले शुक्रबार कान्तिपुरलाई जानकारी दिए ।

'अमृत र चन्द दुवैको तयारी पूरा भइसकेको छ,' प्रशिक्षक पुबुदुले भने, 'दुवैले श्रीलंकाको पोर्ट अथुरिटी क्रिकेट क्लबमा खेल्नेछन् ।' दुवै खेलाडीले त्यहाँ ८ जूनदेखि सुरु भई आठ सातासम्म चल्ने श्रीलंकन यू-२३ अन्तरक्लब क्रिकेट प्रतियोगितामा खेल्नेछन् । टेस्ट मान्यताप्राप्त श्रीलंकाका हरेक खेलाडीको राष्ट्रिय टिममा पुग्ने माध्यम सोही अन्तरक्लब प्रतियोगिता हो ।

'त्यहाँ नखेली राष्ट्रिय टिममा खेल्न पाइँदैन । क्लबकै प्रदर्शनका आधारमा टिममा बोलाइन्छ,' पुबुदुले भने, 'महेला जयबर्द्धनेदेखि कुमार संगकरासम्म त्यसै प्रतियोगिताबाट निस्केका प्रतिभा हुन् ।' पोर्ट अथुरिटीका मुख्य प्रशिक्षक हुन्, सजिथ फर्नान्डो । फर्नान्डो पुबुदुका साथी हुन् । क्लबमा पेस बलरको कमी रहेको गुनासो सजिथले गरेपछि पुबुदुले उपलब्ध गराइदिने वाचा गरेका रहेछन् ।

महेन्द्रनगरका चन्द्र र भैरहवाका अमृत प्रशिक्षक पुबुुदुले मौका मिलाइदिएकामा खुसी छन् । त्यसैले त शुक्रबार घरबाट आएका दुवै शनिबार पुबुदुलाई भेट्नका लागि जाँदैछन् । 'उहाँले हाम्रा लागि ठूलो मौका मिलाइदिनु भयो,' दुवैले भने, 'पाएको मौकालाई हामी पूर्णरूपमा सदुपयोग गर्नेछौं ।' चन्द्र २३ वर्षका भए । उनले दुई महिनाअघि यूएईमा भएको आईसीसी वल्र्ड कप ट्वान्टी-ट्वान्टीमा राम्रो प्रदर्शन गर्दै मन जितेका थिए । 'यूएई यात्रा मेरा लागि टर्निङ-प्वाइन्ट रह्यो,' क्षेत्र नम्बर-६, बैतडीका खेलाडीले भने, 'अब श्रीलंका गएर आफूलाई उत्कृष्ट प्रमाणित गर्नु छ ।' अमृतको पनि योजना त्यस्तै छ । 'पाएको मौकालाई गुमाउन चाहन्न,' एपीएफका खेलाडी अमृतले भने, 'कोचले मप्रति देखाएको भरोसालाई तोड्न चाहन्नँ ।'

दुवै खेलाडीको चिठी नेपाल क्रिकेट संघ -क्यान) मा आइसकेको प्रशिक्षक पुबुदुले जानकारी दिए । 'क्यानले सकारात्मक प्रतिक्रिया दिएको छ । यसै महिनाको अन्त्यसम्ममा दुवै खेलाडी श्रीलंका जान्छन्,' उनले भने । दुवैका लागि क्लबले बस्नका लागि व्यवस्था मिलाइदिएको छ । जाने र खानाको व्यवस्था भने खेलाडी आपै+mले गर्नुपर्ने हुन्छ । 'विभिन्न संस्था र क्यानको सहयोगमा खेलाडी जानेछन्,' पुबुदुले भने ।

पुबुदुले यसअघि शक्ति गौचनलाई भारतको इन्डियन पि्रमियर लिगको राजस्थान रोयल्स क्लब र पारस खड्कालाई क्यानडाको लिगमा खेल्नका जाने वातावरण मिलाइदिएका थिए । शक्ति राजस्थानबाट एक साताको ट्रायल दिंदै नेपाल फर्किए । पारस भने चार महिनाको लिग खेल्न क्यानडाको ओन्टारियो क्रिकेट एकेडेमी तथा क्लबमा अहिले व्यस्त छन् । पुबुदुले ब्याट्सम्यानद्वय अनिल मण्डल र ज्ञानेन्द्र मल्ललाई पनि श्रीलंकामा खेलाउने पहल भइरहेको जानकारी दिए ।