१५ जेठ, सोलुखुम्बु । सोलुखुम्बु जिल्लाको केरुङ-४ का ५१ वर्षीय कामी शेर्पाले आठ दिनमा तीनपटक विश्वको सर्वोच्च शिखर सगरमाथाको सफल आरोहण गरेका छन् । पाँच दिनमा दुईपटक सगरमाथा आरोहण गरेपछि आठौं दिनमा तेस्रोपटक सफल आरोहण गरेको उनले सगरमाथाको आधार शिविरबाट जानकारी दिए ।

आरोही शेर्पाले गत जेठ ६ गते -मे १९ तारिख) शनिबार बिहान १०:३० बजे र जेठ ११ गते -मे २४ तारिख) बिहीबार बिहानको ३ गरी पाँच दिनमा दुईपटक सगरमाथा आरोहण गरेका थिए । त्यसैगरी उनले जेठ १४ गते -मे २७ तारिख) आइतबार बिहानको ४ बजे सगरमाथाको शिखरमा पुगी एकै सिजनमा तीनपटक सगरमाथा सफलतापूर्वक आरोहण गरेका थिए । यी आरोहणले विश्व कीर्तिमान कायम गरेको उनको दाबी छ ।

आरोही शेर्पाले सगरमाथाको सफल आरोहण सन् १९९७ मा पहिलोपटक गरेका थिए । त्यसपछि विभिन्न समयमा गरी यो वर्षको सफल आरोहणसँगै उनले १४ पटक सगरमाथाको आरोहण गरिसकेका छन् ।

शेर्पा सगरमाथा आरोही सङ्घको प्रथम उपाध्यक्षसमेत हुनुहुन्छ । आरोही शेर्पाको एक हप्तापछि काठमाडौँ पुग्ने र पत्रकार सम्मेलन गरी आफूले आठ दिनमा तीनपटक सगरमाथा आरोहण गरेका प्रमाणहरू सञ्चार माध्यमबाट सार्वजनिक गर्ने कार्यक्रम छ ।

अहिले उनी सगरमाथा आधार शिविर आइपुगेका छन् । अब हिमालय क्षेत्रमा बढिरहेको तापमानबारे पनि विश्व समुदायको ध्यानाकर्षण उनको योजना छ । रासस