२१ जेठ, पर्सा । तराई मधेस लोकतान्त्रिक पार्टीका अध्यक्ष महन्थ ठाकुरले लोकतान्त्रिक विधिअनुसार नै सरकारले नयाँ संविधानसभाको चुनावको घोषणा गरेको बताउनुभएको छ । पर्सामा आइतवार विहान आयोजित पत्रकार भेटघाट कार्यक्रममा ठाकुरले नयाँ संविधानसभाको चुनावको घोषणा गरेर सरकारले संवैधानिक बाटो लिएको पनि दाबी गर्नुभयो । उहाँले धेरै कुरामा दलहरुबीच संविधान लेखनको विषयमा सहमति भए पनि अन्तिम समयमा आएर एउटै कारणले संविधानसभा नै भङ्ग हुनु अत्यन्तै दुःखको कुरा भएको उहाँले बताउनुभयो । अध्यक्ष ठाकुरले राज्य पुनःसंरचनाको विषयबाहेक अन्य विषयमा दलहरुबीच सहमति भइसकेको अवस्थामा नेपाली काँग्रेस र नेकपा एमालेको अडान र चाहनाले संविधानसभा विघटन भएको पनि आरोप लगाउनुभयो । उहाँले सङ्घीयतामा काँग्रेस र एमाले जानै नचाहेका कारण पनि संविधान आउन नसकेको बताउनुभयो । उहाँले संविधान जारी गर्न फेरि अर्को चुनाव अपरिहार्य रहेको जिकीर गर्नुभयो । उहाँले सडक सङ्घर्ष गर्दैमा वर्तमान सरकारले राजीनामा नदिने पनि स्पष्ट पार्नुभयो । रासस