पोखरा, जेठ २१ - पूर्व सभासद् रविन्द्र अधिकारीले संविधान निर्माण गर्न नसकेकोमा कास्कीका नागरिकसँग माफी माग्नुभएको छ । २०६४ साल चैत्र २८ गते भएको संविधानसभाको निर्वाचनमा कास्की क्षेत्र नम्बर ३ बाट नेकपा एमालेको तर्फबाट उम्मेदवार भई चुनाव जितेका नेता अधिकारीले संविधानसभा विघटन भएपछि पहिलोपल्ट पोखरामा पत्रकार सम्मेलन गर्दै संविधान नबन्नुको नैतिक जिम्मेवारी लिदै माफी माग्नुभएको हो । आफुहरुले संविधान निर्माणका लागि प्रयास गरेको भएपनि शीर्ष नेताहरु र त्यसमा पनि एकीकृत नेकपा माओवदीका कारण संविधान बन्न नसकेको भन्दै आक्रोश पोख्नुभएको छ । अनेकौं विकल्प र समय रहँदारहदै माओवादीको गलत मनसाय र कदमका कारणले जेठ १४ गते मध्यराती संविधान सभाको विघटन भएको भन्दै अधिकारीले यसवाट नेकपा एमाले चिन्तित भएको बताउनुभयो । अधिकांश समय माओवादी आलोचनामा खर्चेका नेता अधिकारीले अझैपनि सहमतिको विकल्प नभएको बताउनुभएको छ । अब फेरी संविधान सभालाई पुर्नगठन भने गर्नु नहुने उहाँको तर्क छ । सहमति गरी अनुमोदनका लागि केहि दिनका लागि पुर्नगठन गर्न सकिए पनि छलफलकै लागि पुर्नस्थापना गर्ने कुरा अब असम्भव रहेको उहाँको भनाई छ । संविधानसभाले संविधान दिन नसके फेरी चुनावमा नउठ्ने भनि यसअघि नै घोषणा गरेका नेता अधिकारीले आफ्नो पूर्व घोषणामा अडिग रहेको बताउनुभयो । आगामी मंसिर ७ मा घोषणा गरिएको निर्वाचन कुनैपनि हालतमा नहुने उहाँले ठोकुवा गर्नुभयो । नेता अधिकारीले कास्की जिल्ला, पोखरा र आफ्नो निर्वाचन क्षेत्रको विकास निर्माणसँगै सार्वजनिक लेखा समितिमा रही भ्रष्टचार र अनियमितताका विरुद्ध निरन्तर संघर्ष गरेको दाबी गर्नुभयो ।