बैतडी, जेठ २१- सहोदर दाजुभाइबीच घरायसी विवादले सुरु भएको घर झगडा चर्केर काटमार हुँदा मृत्यु भएका सात जनाको शव अहिले जिल्ला अस्पताल, बझाङ लैजाने तयारी भएको छ। शव सदरमुकाम लैजाने तयारी भए पनि सवारी साधन नमिल्दा ढिलाइ भइरहेको छ।
 बझाङको दुर्गम गाविस स्याडी-९ दलितबस्तीमा शनिबार साँझ दुई दाजुभाइबीच भएको झगडाले उग्ररुप लिएपछि सात जनाको मृत्यु भएको थियो।
 मृतकहरुको शव सदरमुकाम लैजाने तयारी भइरहे पनि सवारी साधन नमिलेका कारण केही ढिला भएको बझाङका प्रहरी नायब उपरीक्षक सूर्य केसीले बताए। दलितवस्तीका दुई दाजुभाइ गगन विक र वीरजित विकको परिवारबीच जग्गाको विषयमा विवाद भएर काटमार भएको प्रहरीले जनाएको छ।
 घटनामा वीरजित विक पक्षका पाँचजना र गगन विक पक्षका दुईजनाको मृत्यु भएको प्रहरीले जनाएको छ।मृत्यु हुनेमा वीरजित विककी ३५ वर्षीया श्रीमती झाक्रीदेवी विक, आठ वर्षीय छोरा राजेन्द्र विक, तीन वर्षीय छोरा करन विक, चार वर्षीय छोरा केशव विक र दुई वर्षीया छोरी लक्ष्मी विक रहेका छन्।यसैगरी गगन विकका तीन वर्षीय छोरा पवन विक र दुई वर्षीया छोरी पवित्रा विकको मृत्यु भएको छ।घटनामा घरेलु हतियार चक्कु, बन्चरो, खुँडा प्रयोग गरिएको जनाइएको छ। काटमारमा पाँच वर्षमुनिका पाँच नाबालकको समेत हत्या भएको छ। घटनास्थल सदरमुकाम चैनपुरबाट करिब एक दिनको पैदल दूरीमा पर्दछ। सो गाउँ बैतडीको पूर्वी सिमानासँग जोडिएको छ।सातजनाको विभत्स हत्याले पूरै गाउँ अहिले त्रसित बनेको छ।
 - रासस