काठमाडौं, जेठ २३ - नागरिक समाज तथा विभिन्न पेशा ब्यवसायका नागरिकले नयाँ चुनावको विकल्प नभएको बताएका छन् । सत्तारुढ र सरकार समर्थक दलले काठमाडौंमा गरेको कार्यक्रममा सहभागिहरुले नया चुनावमा जानु नै अहिलेको उत्तम विकल्प भएपनि त्यसका लागि दलहरुवीच सहमति आवश्यक रहेकोमा जोड दिएका हुन् । राजनीतिक विश्लेषक सीके लालले सहमति निकै गाह्रो कुरा भएपनि त्यसको विकल्प नभएको बताउनुभयो ।

उहाँले संविधानसभा ब्युताउने विकल्प असान्दर्भिक भएकाले अग्रसरता लिएर तत्काल सहमतिको वातावरण बनाउन प्रधानमन्त्री बाबुराम भट्टराईलाई आग्रह गर्नुभयो । संसद रिक्त रही रहे सडक हावी हुने सम्भावना धेरै हुने भएकाले त्यसतर्फ सचेत हुन दलका नेताहरुलाई आग्रह गर्नुभयो । लेखक खगेन्द्र संग्रौलाले विधायिका रित्तिएको बेला चुनावको विकल्प नभएको टिप्पणी गर्नुभयो । दलहरुवीचको सहमति आवश्यक भएपनि सहमति सत्ताको टपरी बाँडफाँडका लागि गरिनु नहुनेमा सचेत गराउनुभयो ।
पत्रकार महासंघका अध्यक्ष शिव गाउलेले राजनीतिक सहमति कायम गरेर नया चुनावमा जानुपर्ने धारणा राख्नुभयो । सञ्चारमाध्यम र सञ्चारकर्मीमाथि भएको दुब्र्यवहारको विरोध गर्दै अध्यक्ष गाउलेले राजनीतिक दल र सरकार गम्भिर भएर सहमति खोज्नुपर्ने बताउनुभयो । साप्ताहिक पाक्षिक पत्रिका सञ्जालका अध्यक्ष देवप्रकाश त्रिपाठीले संविधानसभाको पुनस्र्थापना उपयुक्त विकल्प नभएको जिकिर गर्नुभयो ।
ब्यांकर अनिल शाहले संविधानसभा विगठनले सवैलाई दुखि बनाएपनि अझै विकल्पहरु बाकी रहेकाले सवै दलहरु एक हुनुपर्ने र निकासको उपयुक्त बाटो खोज्नुपर्ने बताउनुभयो । चलचित्रकर्मी अशोक शर्माले आयातित सल्लाहलाई बढि महत्व दिएका कारण समस्या बढ्ने गरेको धारणा राख्नुभयो ।
हास्य कलाकार जितु नेपालले ४ बर्षसम्म संविधानसभाको फिल्म हेरेपनि अन्तिममा हिरो र भिलेन चिन्न नसकिएको ब्यङ्ग गर्नुभयो । सैन्यविद सीवी गुरुङ्गले सेनाको योगदान र पृष्ठभुमिलाई यदाकदा चुनौती दिने गरिएकोमा गुनासो गर्नुभयो । नेपाली सेनाले सधै लोकतान्त्रिक राजनीतिक कदमलाई स्वीकार्ने बताउनुभयो  ।