सोम सुनुवार -  इलाम, जेठ ३० – भाइरल प्रकोप फैलिएको इलामको जोगमाईमा मंगलवार एक वृद्धको ज्यान गएको छ । निमोनियाँका कारण जोगमाई–७ घर भई वडा नम्वर २ मा बस्दै आएका ७० वर्षीय मनबहादुर राईको ज्यान गएको हो । एकहप्तादेखि फैलिएको रोगको उपचार हुन नसक्दा उहाँको ज्यान गएको स्थानीयवासिन्दाले बताएका छन् ।

जोगमाईको वडा नम्वर २ र ७ मा टाउको दुख्ने, रिंगटा चल्ने, ज्वरो आउने, वान्ता हुने जस्ता समस्याले दुई सय जना भन्दा बढी विरामी परेको स्थानीय भक्तबहादुर राईले बताउनुभयो ।
गाउँमा महामारी फैलिएपछि जिल्ला स्वास्थ्य कार्यालयले अहेव पुण्यमणि तिम्सिनाको नेतृत्वमा औषधि सहित त्यसतर्फ एक टोली पठाएको जनाएको छ । गाउँमा रोग फैलिएपनि स्वास्थ्यकर्मी नहुँदा विरामीलाई उपचारका लागि इलामको फिक्कल र झापातर्फ समेत लगिएको स्थानीयले बताएका छन् ।