फाल्गुन २९ - चाल्र्स डिकिन्सन लिखित उपन्यास 'ब्लेक हाउस' माथि निर्मित एक मिनेट लामो अमुक फिल्म एक सय ११ वर्षपछि फेला परेको छ ।

लन्डनस्थित फिल्म र टेलिभिजन भिडियोको राष्ट्रिय संग्रहालय बिएफआइमा उक्त फिल्म भेटिएको हो । त्यहाँ यो फिल्म ५० वर्षभन्दा बढी समयदेखि बेवारिस थन्किएको थियो । उपन्यासको एक पात्र जोएको मृत्युको दृश्य समेटिएको उक्त फिल्म सन् १९०१ मा बि्रघटनमा बनेको थियो । फिल्मलाई जिए स्मिथले बनाएको अनुमान छ । किनकि फिल्ममा त्यसताकाका प्रसिद्ध फिल्मकर्मी मानिने स्मिथकी पत्नी पनि देखिएकी छन् । बि्रओनी डिक्सनले उक्त फिल्मलाई चाल्र्सको दुई सयौं जन्मदिनको भोलिपल्ट फेबु्रअरीमा फेला पारेकी थिइन् ।

'डिकिन्सनसँग जोडिएको यस्तो दुर्लभ फिल्म पाउनु अनौठो हो,' डिकिन्सनका उपन्यासका पात्रबारे अनुसन्धान गरिरहेकी डिक्सनले भनिन्, 'यो विश्वकै पुरानो डिकिन्सियन फिल्म हो ।' डिकिन्सन १९ औं शताब्दीका प्रसिद्ध उपन्यासकार हुन् । संग्रहालय स्रोतअनुसार, सिंगल सटको उक्त फिल्म १७ दशमलब ५ एमएममा खिचिएको हो ।

फिल्मका रूपमा प्राप्त हालसम्मकै पुरानो यस फिल्मको दृश्यमा ब्लेक हाउसबाट बाहिरिँदै गरेको एक वाचम्यानले गरिब जोएलाई सडकमा लडिरहेको देख्छ । हिउँ परेको चिसो साँझमा लालटिन बोकेर आएको उसले उठाउन खोज्दा जोए मरिसकेको हुन्छ ।

यो फिल्म बिएफआइ संग्रहालयमा सन् १९५४ मै संगृहीत भइसकेको खुलेको छ । फिल्मकर्मी स्मिथबाटै केही फिल्मसँगसँगै लिइएको यसलाई असावधानीवश गलत शीर्षकमा सूचीकरण गरिएकाले बेवारिसे बनेको संग्रहालयले जनाएको छ ।