ललितपुर, चैत २५  - बी डिभिजन राष्ट्रिय लिग फुटबल अन्तर्गत शनिवार भएको खेलमा टुसाल युथ क्लव विजयी भएको छ । टुसाल युथ क्लबले स्याङ्जाको ट्रिनिटी क्लबलाई २–० गोलले पराजित गरेको छ ।
 

टुसालका लागि श्यामबाबू मगर र वर्तमान राईले ४८ र ८६ औं मिनेटमा गोल गरेका थिए । जितपछि टुसाल युथ ६ खेलबाट ९ अंकसहित तालिकाको पाँचौ स्थानमा छ । जारी प्रतियोगितामा अहिलेसम्म एउटा मात्र खेल जितेको ट्रिनिटी पुछारमा छ ।
लगनखेल स्थित बुद्धिविकास खेल मण्डलको खेल मैदानमा शनिवार नै भएको च्यासल युथ क्लब र सर्लाहीको कस्तुरी युवा क्लबबीचको खेल गोलरहित बराबरीमा समाप्त भएको छ । बराबरीपछि कस्तुरी ९ अंक सहित तालिकाको चौथो स्थानमा छ । ४ अंकमात्र बटुलेको च्यासल पनि सातौ स्थानमा छ । १३ अंक बटुलेको मध्यपुर युथ एशोसिएन पहिलो र १३ अंक नै बटुले पनि गोल अन्तरका आधारमा संकटा क्लव दोश्रो स्थानमा छ ।